دنيا الادب

قصيدة عبيطة جدا ًً.. (( نجوى لقلب عبيط ))

 

قصيدة عبيطة جدا ً …
(( نجوى لقلب عبيط ))
==============

ف عينيه ليكى
.. فى كل طلة
ييجى ميت جواب…
لسؤال بيتوضى بنور القلب
فى ساعة صفا
.. ورافض يبوح
………………………..

أول جواب :
إن المسافة بين عينيه وبين عنيكى
زى سنوات اندهاش الحور ..
لما تناجى .. قلب يمكن حبها…
.. لكن جبان .
………………………………..
تانى جواب :
ندمان أنا …
على كل أشعارى
اللى سافرت فى الفضا
من قبل ما تشوف الجمال المستخبى
.. جوا أجمل عين وروح .
……………………………………
تالت جواب :
مدبوح أنا …
من قلب شريان المحبة
لكل شرايييين الاشتياق
يا ملهمة للحلم يكبر.. يكبر…
بس راكب.. مهرة الوجع الحرون .
………………………………
رابع جواب :
مجنون أنا …
علشان أصدق.. إن صياد الشجن
يقدر يسافر …
.. جوه ترنيمة وروود .
……………………………..
خامس جواب :
موعود أنا …
بالفرحة تيجى.. بس ليه متأخرة
وتخلى ضل الروح يشابى…
.. ع اللى فات.. وما طلتهوش .
……………………………..
سادس جواب :
مدهوش أنا …
من كشف أرواحنا.. لذواتنا
فى سويعات التجلى
فننتشى .. لجل نبوح.. نبوح…
.. لو حتى من غير الكلام .
…………………………
سابع جواب :
يا سلام د انا …
بشرب قهاوى مرار كتير
بس النهارده قهوتك
واخدانى لبلاد من حرير…
.. مع شوك حنون .
…………………………..
تامن جواب :
راح اصون أنا …
سر اشتباك الشوك مع الروح الحرير
مع نبض قلبى …
.. ولا حد شاف .
…………………………..
تاسع جواب :
هوه ارتجاف الروح …
ورعشة ننى صادق …
جددوا الإيمان فى قلبى
.. بالحياة .
………………………….
عاشر جواب :
لو تاه فؤادى …
بعد ما شابت سنينى
واتلخبطت كل المشاعر.. يا قمر
يبقى انجذاب روحى لروحك …
ويّا ذهول قلبى …
اللى مفطوم ع الوجع …
هما الطوفان المستكين
جوه .. الحنايا.. والخفايا..
.. والزوايا.. والخلايا…
بس اوعدك …
إنى اتولدت من تانى
فى صمتى البديع
مع شعرى اللى باقيلى
.. فوق خد الزمن
يرسم حكايتنا سوا
ويعرفك كل الحكاوي
عن قلبى اللى كان تملّى…
زى بهلول عاش حياته…
زى طير يحلم يسافر …
ويّا جمر المستحيل …
فوق خدود كل الصبايا …
.. كل الصبايا .. يا قمر .

أحمد ابراهيم عيد

Facebook Comments

أخبار ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق